फ्राइडे रिलिज: सर्वाधिक प्रतीक्षा गरिएको 'अवतार'को दोस्रो भाग सिनेमा हलमा

काठमाडौं: आजबाट सिनेमा हलमा नयाँ फिल्म रिलिज भएको छ। सन् २००९ मा प्रदर्शनमा आएको चलचित्र 'अवतार'को दोस्रो भागको रूपमा रहेको 'अवतार: द वे अफ वाटर' आजबाट प्रदर्शन भएको हो।

१३ वर्षपछि हलमा नयाँ भीएफएक्स, नयाँ कथा र नयाँ स्टारकास्टसहित फर्किएको अवतारले हाल संसारभर आक्रामक व्यापार गरिरहेको छ। नेपालमा समेत सिनेमा हलहरूमा अवतारको यस संस्करणको सिट बुकिङ आक्रामक छ।

विश्वचर्चित निर्देशक जेम्स क्यामरूनको निर्देशनमा बनेको फिल्म एक्सन, एडभेन्चर र फ्यान्टसी विधामा बनेको छ। प्याण्डोरा नामक ग्रहमा आफ्नो नयाँ परिवारसहित बसेको ज्याक सुल्लीको कथा फिल्मले भन्छ।

फिल्मका कलाकारहरूमा साम वर्थिङटन, जो साल्डाना, सिगोर्ने विभर, स्टिफन ल्याङ लगायत रहेका छन्। फिल्म ३ घण्टा १० मिनेट लामो छ। यो वर्षकै लामो फिल्ममा 'अवतार: द वे अफ वाटर' पर्छ।

नेपाली दर्शकले यो फिल्म थ्रीडी र टुडी दुवै भर्सनमा हेर्न पाउनेछन्।

पुष १, २०७९ शुक्रबार ११:४९:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।