गायिका आस्थाले भिसाको दुरुपयोग गर्दै पाँच महिना अमेरिकामा काम गर्दा अध्यागमनले नेपाल फर्कायो

काठमाडौँ : साङ्गीतिक कार्यक्रममा सहभागी हुन भनेर अमेरिका गएकी आस्था राउत लामै समय नेपालमा सक्रिय देखिइनन्। हस्की भोइसका कारण स्टेज कार्यक्रमहरूमा राम्रै माग हुने उनी सामाजिक सञ्जालमा तस्बिरहरू राखिरहन्थिन् अमेरिकातिरकै।

केही महिना अगाडि उनी नेपाल फर्किएर मिडियामा देखिन थालिन्। हराउन थालेको चार्म फर्काउन सक्रिय भइरहेकै बेला बिहीबार एकाएक अमेरिकाको एक कार्यक्रममा भाग लिन जाँदा उतै अध्यागमनले फिर्ता पठाएको खुल्यो।

उनले प्राविधिक कारणले कार्यक्रममा भाग लिन नपाएको भन्दै दुख व्यक्त गरिन् फेसबुकमा। पर्यटन भिसामा अमेरिकाको साङ्गीतिक कार्यक्रममा सहभागी हुन गएको बेला अध्यागमनले उनलाई नेपाल फर्काएको हो।

घुम्न जाने भनेर पर्यटन भिसा आवेदन गर्ने र त्यसकै आडमा पैसा लिएर साङ्गीतिक कार्यक्रम लगायतमा सहभागी हुने नेपाली कलाकारहरूको पुरानै प्रवृत्ति हो। सम्बन्धित देशको अध्यागमनले चाल नपाएसम्म उनीहरू सहजै आउजाउ गर्छन्। तर जब घुम्न भनेर आएर अन्य गतिविधिमा सहभागी भएको खुल्छ अनि नोटिस्ड हुन थाल्छन्।

तर आस्थालाई अमेरिकी अध्यागमनले अमेरिका छिर्न नदिएर नेपालै फर्काएको कारण केवल पर्यटन भिसामा साङ्गीतिक कार्यक्रममा सहभागी हुन जाने प्रयास गर्नु मात्र नभएको अमेरिकामा रहेको एक स्रोतले उकेरालाई जानकारी दिएका छन्। पर्यटन भिसामा अमेरिका गएकाले काम गर्नु गैर कानुनी हो। तर केहीले कानुन छल्दै काम गर्दा कानुनी झण्झटमा पर्ने गरेका छन्।

ती स्रोतका अनुसार यस अगाडि आस्था यस्तै साङ्गीतिक कार्यक्रममा सहभागी हुन अमेरिका पुगेर उतै पाँच महिना बसेर काम गरेकी थिइन्। उनको गतिविधि सरकारी निकायमा पुग्यो। ६ महिनाको मात्र भिसा रहेकाले उनी पाँच महिना उतै काम गरेर नेपाल फर्किइन्।

अनि अहिले पुन पर्यटक बनेर अमेरिका जान खोज्दा उनको पुरानो रेकर्ड खराब देखेपछि अध्यागमनले नेपाल फर्काएको स्रोतले बतायो। यसबारे गायिका आस्थासँग कुरा गर्ने प्रयास गर्दा उनको मोबाइल स्विच अफ थियो।

मंसिर २९, २०७९ बिहीबार १६:५६:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।