परिवारसहित आज नेपाल आउँदै विवेक ओबरोय

काठमाडौं : भारतीय अभिनेता विवेक ओबरोय बुधबार नेपाल आउने भएका छन्।

उनले भिडियो सन्देश जारी गर्दै आमाबुवा, श्रीमती प्रियंका अल्वा, छोरा विवान र छोरी अमेयासँग नेपाल आउने बताएका छन्।

नेपाल भ्रमणको बारेमा आफ्नो उत्साह व्यक्त गर्दै ओबेरोयले भगवान बुद्धको जन्मस्थल लुम्बिनीमा हुने भेटघाट तथा अभिवादन कार्यक्रममा सहभागी हुने बताए।

उनले सगरमाथा आधार शिविर, पोखरा, लुम्बिनी, काठमाडौंको पशुपतिनाथ मन्दिरलगायतका ठाउँ घुम्न आतुर रहेको बताए। ओबेरोयले आफ्नो नेपाल भ्रमणले नेपालको पर्यटन प्रवर्द्धनमा टेवा पुग्ने विश्वास व्यक्त गरे ।

‘नेपाल भ्रमणपछि अरुलाई पनि नेपाल घुम्न र अनुभव गर्न सुझाव दिनेछु। नेपालसँग भारतको सुन्दर र बलियो सम्बन्ध छ। हामी नेपालीहरू जस्तै छौं र नेपालीहरू हामी जस्तै छन्,’ ओबेरोयले भिडियो सन्देशमा भनेका छन्, ‘२० वर्षको अभिनय करियरमा नेपाली दर्शकले दिएको मायालाई सम्झेर म नेपाल आउन लागेको हुँ।’

सन् २००२ मा राम गोपाल वर्माको ग्याङ्स्टर ड्रामा कम्पनीबाट बलिउडमा डेब्यु गरेका ओबेरोयले उनलाई दुईवटा फिल्मफेयर अवार्ड जितेका थिए। हालै भारतीय प्रधानमन्त्री नरेन्द्र मोदीको बायोपिक फिल्म ‘पीएम नरेन्द्र मोदी’मा देखिएका छन्।

मंसिर २८, २०७९ बुधबार १३:३०:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।