राजपाल यादवकाे स्कुटर दुर्घटना, विद्यार्थीलाई ठक्कर दिएपछि पर्याे उजुरी
एजेन्सी : आफ्नो कमिक क्यारेक्टरबाट मानिसको मनमा छुट्टै ठाउँ बनाएका अभिनेता राजपाल यादव अहिले चर्चामा छन्। यसपटक उनी आफ्नो कुनै फिल्मका कारण चर्चामा आएका होइनन्।
हालै राजपाल यादव उत्तर प्रदेशको प्रयागराजको कटरा क्षेत्रमा आफ्नो नयाँ फिल्म ‘लक्ष्मी टकीज’ को सुटिङमा व्यस्त थिए। यस क्रममा उनलाई एउटा दृश्य दिइएको थियो जसमा उनले स्कुटर चढ्नुपरेको थियो।
सुटिङ चलिरहेको बेला राजपालले नियन्त्रण गुमाएर विद्यार्थीलाई ठक्कर दिएको भारतीय सञ्चारमाध्यमले जनाएका छन्। रिपोर्टका अनुसार, विद्यार्थीले फिल्मको टोलीले दुर्व्यवहार गरेको भन्दै पुलिसमा उजुरी दिएका छन्।
एकातिर विद्यार्थीले आफूसँग माफी माग्नुको साटो दुर्व्यवहार गरेको आरोप लगाउँदै आएका छन् भने अर्कोतर्फ फिल्मको निर्माण पक्षले नखिच्न भन्दाभन्दै पनि केही विद्यार्थीले मोबाइलबाट रेकर्डिङ गरेकाे आरोप लगाएका छन्।
यसैबीच प्रहरीले घटनाको अनुसन्धान गरिरहेको छ।
प्रहरीले भन्यो, ‘अभिनेता यादव क्लचको तार चुँडिएको पुरानो स्कुटरमा सवार थिए। अन्जान विद्यार्थीलाई स्कुटरले ठक्कर दिए। विद्यार्थीलाई गम्भीर चोट भने लागेको छैन। हामी घटनाको अनुसन्धान गरिरहेका छौं।’
राजपाल यादवले हालसम्म ‘भूल भुलैया’, ‘डोल’, ‘फिर हेरा फेरी’, ‘भागम भाग’ जस्ता धेरै उत्कृष्ट फिल्ममा काम गरेर आफ्नो अभिनयको जादू चलाइसकेका छन्।
मंसिर २७, २०७९ मंगलबार १४:२६:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
