अपहरण गरेर २ किशोरीको सामूहिक बलात्कार, नौ जना पक्राउ अन्य फरार

बुटवल : १५ र १६ वर्षका २ किशोरीको अपहरण गरेर सामूहिक बलात्कार गरेको आरोपमा ९ जना पक्राउ परेका छन्। प्रहरीले बुधवार राती किशोरीको अपहरण गरेर बलात्कार गरेको आरोपमा उनीहरूलाई पक्राउ गरेको हो।

रुपन्देहीको कञ्चन गाउँपालिका–२ गोफ्लापुरमा उनीहरूले बलात्कार गरेको प्रहरीको दाबी छ। प्रहरीले घटनामा संलग्न रहेको आरोपमा बिहीबार सैनामैना नगरपालिका–१० का १८ वर्षका बबि पाण्डे, २६ वर्षीय रामबहादुर बिक, सैनामैना–११ बनकट्टिकी १९ वर्षीय पदम कार्की र गैडहवा गाउँपालिका–८ का १८ वर्षीय राहुल परियारलगायतलाई पक्राउ गरेको हो।

जिल्ला प्रहरी कार्यालय रुपन्देहीका प्रहरी प्रवक्ता श्यामु अर्यालका अनुसार बुधवार गाउँमा लागेको सांस्कृतिक कार्यक्रम हेरेर फर्कने क्रममा ती किशोरी अपहरणमा परेका थिए। उनीहरूलाई १२ जनाको समूहले अपहरण गरेर गैडहवा गाउँपालिका–२ कुलीचौरस्थित कञ्चन खोलाको बगरमा बलात्कार गरेको प्रहरीको दाबी छ।

घटनामा संलग्न रहेका अन्यबारे सूचना आइसकेको र उनीहरूको खोजी कार्य तीव्र पारिएको प्रहरीको दाबी छ।

कात्तिक १७, २०७९ बिहीबार २२:०५:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।