अनमोल केसीको ग्याङ्स्टर लुक्समा 'छड्के २' को पोस्टर सार्वजनिक, फागुन १९ गते फिल्म प्रदर्शन हुने

काठमाडौं: अनमोल केसी अभिनित चलचित्र 'छड्के २' को पोस्टर सार्वजनिक भएको छ। यसअघि नै फर्स्ट लुक सार्वजनिक गरिसकेको निर्माण युनिटले आज दोस्रो पोस्टर पनि सार्वजनिक गरेको हो।

२०६९ सालमा रिलिज भएको फिल्म 'छड्के' उत्ति चर्चित भएको थिएन। तर अलि फरक स्वादको फिल्म, पृथक सङ्गीत र निखारिएको अभिनयका कारण फिल्मले एउटा छाप भने छोडेको थियो।

यसको दोस्रो भागमा भने चकलेटी हिरो अनमोललाई पूरै ग्याङ्स्टर लुक्समा देखाएर जोखिम उठाएका छन् निर्देशकले। चलचित्रको फर्स्ट लुकमै अनमोल हातमा खुँडा बोकेर ओठमा चुरोट च्यापेर केही हेरिरहेको देखिएका थिए। हातभरि ट्याटु थियो। अनुहार रक्ताम्य थियो।

आज सार्वजनिक गरिएको तस्बिरमा अनमोललाई झन् परिस्कृत 'डन' अवतारमा देखिन्छ। उनलाई बाइकमा टोलीसँग देखाइएको छ।

छड्के २ पनि छड्केको पहिलो भागका निर्देशक निगम श्रेष्ठले नै निर्देशन गर्नेछन्। यसका निर्माता प्रशान्त गिरी र देवकुमार श्रेष्ठ हुन्।

अहिले भने फिल्मको प्रदर्शन मिति पनि सार्वजनिक गरिएको छ। फिल्म आउँदो फागुन १९ गते प्रदर्शन हुनेछ।

यही मितिमा अरू नेपाली फिल्मले पनि आफ्नो प्रदर्शन तय गरिसकेका छन्। हालसम्म तय भएअनुसार ‘वर एन्ड वधु’, ‘परस्त्री’, ‘बुलाकी’ र ‘छक्का पञ्जा ४’ फागुन १९ मा भिड्दैछन्। अब यही मितिमा ‘छड्के २’ पनि प्रदर्शन हुने हुँदा फिल्म जे जस्तो बने पनि नेपाली बक्स अफिसमा एउटा तरङ्ग भने आउने पक्का छ।

कात्तिक १५, २०७९ मंगलबार ०९:४५:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।