हरिवंश अभिनित ‘महापुरुष’को ‘बा’ गीत सार्वजनिक

काठमाडौं : ‘जात्रा’ फेम निर्देशक प्रदीप भट्टराई निर्देशित चलचित्र ‘महापुरुष’ को पहिलो गीतको भिडियो सार्वजनिक गरिएको छ।

बुवाको मुख हेर्ने दिनको अवसर पारेर सार्वजनिक गरिएको ‘बा’ बोलको गीतमा बुवाछोराको सम्बन्धको उतारचढावलाई देखाइएको छ।

रिदम कँडेलको स्वर, संगीत र एरेन्ज रहेको गीतमा लोकप्रिय कवि नवराज पराजुलीको शब्द छ। गीतको भिडियोमा हास्यकलाकार हरिवंश आचार्य बुवा बनेका छन् भने अर्का मुख्य कलाकार अरुण क्षेत्री छोराका रूपमा देखिएका छन्।

कात्तिक ११ गते प्रदर्शनको तयारीमा रहेको चलचित्रको पोस्टर केही दिनअघि मात्र सार्वजनिक भएको हो। पोस्टरले राम्रो चर्चा कमाइरहँदा चलचित्रको पहिलो गीत सार्वजनिक भएको हो।

चलचित्रमा आचार्य र क्षेत्रीका अलवा मदनकृष्ण श्रेष्ठ, गौरी मल्ल, रविन्द्रसिंह बानियाँ, सिरु विष्ट, राजाराम पौडेल लगायतका कलाकारको अभिनय छ।
अहिले चलचित्रको पोस्ट प्रोडक्सनको काम चलिरहेको छ।

भदौ ११, २०७९ शनिबार १५:३४:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।