'छड्के २' को फर्स्ट लुक सार्वजनिक, चकलेटी अनमोल ग्याङ्स्टर भर्सनमा देखिए

काठमाडौं: २०६९ सालमा रिलिज भएको फिल्म 'छड्के'को दोस्रो भागको फर्स्ट लुक सार्वजनिक भएको छ। '२.० छड्के' लेखिएको पोस्टर फिल्मका लिड कलाकार अनमोल केसीले सामाजिक सञ्जालमार्फत सार्वजनिक गरेका हुन्।

अनमोल आफ्नो पहिलो फिल्मदेखि नै चकलेटी अवतारमा मात्र देखिँदै आएका छन्। बीचमा 'कृ' फिल्ममा मात्र उनी फरक ग्याङ्स्टर लुकमा देखिएका थिए। तर त्यो त्यति अरू फिल्म जस्तो चलेन।

यसपटक पनि अनमोलले ग्याङ्स्टर लुकमा देखिएर ठूलो जोखिम उठाएका छन्। पोस्टरमा अनमोल हातमा खुँडा बोकेर ओठमा चुरोट च्यापेर केही हेरिरहेका छन्। हातभरि ट्याटु छ। अनुहार रक्ताम्य छ।

फिल्म छड्केको पहिलो भाग पनि उत्ति चर्चित होइन। 'लुट'को कलाकार र अलि फरक स्वादको फिल्म भएकाले एउटा छाप छोडेको थियो।

त्यसमा पनि विपीन कार्कीको अभिनय र 'तेस्को नाम इन्दु मेरो नाम विन्दु' जस्ता डायलगले फिल्मलाई चिनाएको हो। छड्केको पहिलो भागमा संगीत पनि पृथक थियो।

छड्के २ पनि छड्केको पहिलो भागका निर्देशक निगम श्रेष्ठले नै निर्देशन गर्नेछन्। यसका निर्माता प्रशान्त गिरी र देवकुमार श्रेष्ठ हुन्।

अब अनमोललाई ग्याङ्स्टर लुकमा दर्शकले पो कतिको रुचाउने हुन् त्यो महत्त्वपूर्ण छ। फिल्मको रिलिज डेटहरू केही पनि सार्वजनिक भएको छैन।

भदौ ११, २०७९ शनिबार ०९:५२:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।