पूजा-आकाशको अभिनयले दर्शकको मन सम्हालिएला !
काठमाडौँ : निर्देशकमा सुदर्शन थापा, नायिका पूजा शर्मा अनि नायक आकाश श्रेष्ठ। भदौ १७ गते रिलिज डेट राखेको फिल्म 'सम्हालिन्छ कहिले मन' हेरेर दर्शकको मन सम्हालिएका कि बिथोलिएला यी तीन नामले नै केही सङ्केत गर्छ नै।
फिल्मको टाइटल लोकप्रिय गायक सुगम पोखरेलको ' सम्हालिन्छ कहिले मन, कहिले त्यसै अत्तालिइदिन्छ' को अघिल्लो लाइनबाट लिइएको हो।
त्रिकोणात्मक प्रेम सम्बन्धलाई आधार बनाएको फिल्म निर्माण भएको २ वर्षपछि हलमा लाग्दैछ। हालसालै छायाङ्कन सकिएको भए पूजा शर्मा र आकाश हुने सम्भावना निकै कम थियो। त्यो बेला रिल र रियल दुबैतिर जमेको जोडिलाई लिएर एबी इन्टरनेशनलको ब्यानरमा अमित बस्नेतले फिल्म बनाउने हिम्मत गरे।
तर फिल्म हलसम्म आइपुग्दा भने सम्हालिनु पर्नेको मन नसम्हालिएर बरालिइसकेको छ। अब मन बरालिएको कुरा दर्शकसम्म नपुगेको भए त हुन्थ्यो नै छरपस्टै भइसकेको छ यो विषय।
त्यसमा पनि यो जोडिलाई दर्शकले कसरी लिन्छन् अहिले भन्ने त फिल्म 'सम्झना बिर्सना' को बिर्सन लायक व्यापारबाटै पनि देखियो नै। यी दुवैको सम्बन्धले फिल्मको प्रमोसनमा कति असर पर्ने रहेछ भन्ने पनि देखियो।
यसमा निर्देशक सुदर्शन जोडिएकाले माहौल केही फरक हुनसक्छ। नत्र कलाकारको क्रेज अनि हलसम्म जाने दर्शकको मुड भदौ १७ सम्म नबदलिए यो फिल्मका निर्माताको मन सम्हालिन गाह्रै होला कि!
भदौ ५, २०७९ आइतबार ००:२५:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
