विशालको सिफारिसमा छक्कापन्जा ४ मा बेनिशा !
काठमाडौँ : निर्देशक विशाल भण्डारी र बेनिशा हमालबिचको सम्बन्धमा ठाकठुक परेको एकाध वर्ष भएको थियो। दुवैको सम्बन्ध औपचारिकतामा पुग्दा छक्कापन्जा ४ ले भने दुवैको सम्बन्ध सुधार्ने सङ्केत देखिएको छ।
फिल्ममा नजमेपछि अहिले विशाल रियालिटी कमेडीतिर लागेका छन्। कमेडी च्याम्पियन चलाउँदा केकी अधिकारी र रीमा विश्वकर्माको साथ पाएका उनी अहिले कमेडी क्लब विथ च्याम्पियन्स् चलाइराखेका छन्।
उनलाई अहिले दीपाश्री निरौलाले साथ दिइरहेकी छिन्। बेनिशा र विशालको सम्बन्ध सुधार्न यी नै दीपाको साथले काम गरेको चर्चा छ फिल्मी बजारमा अहिले।
बेनिशाका लागि कुनै लक्कीचार्म फिल्म आइदिएन। मध्यममात्र बनिदियो उनको करिअर पनि। छक्कापन्जा हिट फिल्म सिरिज भइहाल्यो। यसमा जोडिन सके दिन फिर्न नि सक्छ बेनिशाको। र उनी जोडिन पनि सफल भइन। त्यसको बेनिशाको भन्दा पनि विशालको दह्रो सिफारिस मुख्य कारण रहेको बताइन्छ।
बेनिशाले विशाललाई अनुरोध गरेपछि उनले नै दीपासँग छक्कापन्जाका लागि बेनिशालाई लिन रिक्वेस्ट गरे। अब आफ्नै टिमको भाइ जितुले नपत्याएको खोसेको कुर्सीमा ल्याएर राख्ने विशालको रिक्वेस्ट कसरी नाइँ भन्नु। उनले ल भनिन्।
अब दीपा-दीपक टिममा दीपाले गरेको निर्णयमा अन्य कसले नो भन्ने साहस। बेनिशा पास भइन अनुबन्ध हुन। अभिनयमा त सिफारिस चल्दैन क्यार। आफै पास हुनु ल।
साउन १०, २०७९ मंगलबार २३:२४:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
