४३ औँ जन्मदिन पारेर अभिनेता खगेन्द्रले सार्वजनिक गरे पानीफोटोको ट्रेलर

काठमाडौँ : कलाकार खगेन्द्र लामिछानेको जन्मदिन पारेर फिल्म ‘पानीफोटो’को ट्रेलर सार्वजनिक भएको छ। रेडियो नाटकमा अभिनय र निर्देशन गर्दागर्दै फिल्म क्षेत्रमा प्रवेश गरेका उनी अब निर्देशक भइसकेका छन्।

४३ वर्ष पुरा गरेर ४४ वर्षमा प्रवेश गरेको अवसरमा आयोजित कार्यक्रममा उनको पहिलो निर्देशन रहेको फिल्म ‘पानीफोटो’ को ट्रेलर सार्वजनिक गरियो।

यो उनैले लेखेको नाटकलाई फिल्ममा रूपान्तरण गरिएको हो। फिल्म माओवादी द्वन्द्वको पृष्ठभूमिमा बनेको छ।

खगेन्द्रले कार्यक्रममा माओवादी जनयुद्धको समयमा डेढ दशक अगाडि बेपत्ता भएको छोराको पर्खाइमा बसेको बा-आमाको कथालाई समेटेको बताए। उनले नाटक गर्दा नै कुनै दिन यही कथामा फिल्म बनाउने वाचा गरेको र त्यो पुरा भएको बताए।

सार्वजनिक भएको ट्रेलरमा अनुप बराल, मेनुका प्रधान प्रकाश घिमिरे, माओत्से गुरुङ, मलिका महत, बुद्धि तामाङ र खगेन्द्र लामिछानेको झलक राखिएको छ।

 टुकी आर्ट्सले र मञ्जुश्री फिल्म मिलेर यो फिल्म बनाएका हुन्। लामिछानेले ‘पशुपति प्रसाद’ र ‘धनपति’ जस्ता मौलिक नेपाली स्वादका फिल्ममा अभिनय गरेर आफ्नो अलग छवि बनाइसकेका छन्। निर्देशन यात्रा अभिनय झैँ अलग हुन्छ या हुन्न साउन १३ मा खुल्ने नै छ।

असार २८, २०७९ मंगलबार २२:४३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।