पूजाले पललाई 'मुटुबाट निकालेर' अनमोललाई राखेकी हुन् त!

काठमाडौँ : युवा पुस्तामाझ रुचाइएका अभिनेता अनमोल केसी प्राय आफ्नो प्रडक्सन हाउस बाहिरका फिल्ममा कमै अभिनय गर्छन्। जति अभिनय गरेका छन् कमजोरै भए पनि उनको क्रेजका कारण फिल्म व्यावसायिक रूपमा भने उठ्नै नसक्ने गरी डुबेका छैनन्।

त्यसमा एक कारण उनको अपोजिट कास्ट पनि हो। उनले सँगै अभिनय गर्ने अभिनेत्रीहरू कि कन्ट्रोभर्सीदेखि अलि टाढै बस्न रुचाउने कि सुहाना थापा अनि अदिति बुढाथोकी जस्ता नयाँ अभिनेत्रीहरू भए।

उनको क्रेजलाई क्यास गर्न पुरानै अभिनेत्री अनि निर्माताहरुले प्रयास नगरेका हैनन्। तर उनीसम्म पुग्न भुवन केसीको सुरक्षा ढोका पार गरेर पुग्नुपर्ने भएकाले सबैले सिधै अनमोलसँगै कमै डिल गर्न पाए। जस कारण जो जसले अनमोलसँग स्क्रिन सेयर गर्ने चाहना राखे वा जसले आफ्नो लगानीमा उनलाई अनुबन्ध गरेर फिल्म बनाउन चाहे धेरै सफल भएनन्।

अभिनेता पल शाह नाबालिग बलात्कारको मुद्दामा पुर्पक्षका लागि जेलै परेपछि पूजा शर्मा लभर ब्वायको खोजीमा थिइन् फिल्म बनाउन। आफ्नै सोलो लगानीमा फिल्म बनाउने योजनामा रहेको उनले आगामी फिल्ममा उनै अनमोल केसीलाई अनुबन्ध गर्न सफल भइन्। उनले अनमोलसँगको अग्रिमेन्ट पेपर बुझाइरहेको तस्बिरै सार्वजनिक गरेकाले अनमोल पनि पूजासँग स्क्रिन सेयर गर्न राजी भएकै देखियो।

अब अनमोल भएपछि फिल्म लभ स्टोरीमा आधारित हुने नै भयो। चुहिएका सूचनाहरू अनुसार फिल्मको नाम भने अझैँ जुरेको छैन। अनि अहिलेसम्मको प्रगति विवरण भनेको निर्मात्री पूजा अनि निर्देशक सुदर्शन थापा हुन्।

फिल्मको वान लाइन स्टोरी मात्रै बनेको छ रे अहिलेसम्म। त्यही वन लाइन स्टोरी सुनेरै अनमोल पूजासँग स्क्रिन सेयर गर्न राजी भएका दाबीहरू सार्वजनिक भइरहेका छन्।

पूजा र कन्ट्रोवर्सी त सँगसँगै आइनै रहन्छन्। पल शाह पक्राउ परेपछि 'पल त मेरो मुटुमा छ' भन्दै पलका फ्यानलाई फिल्म हलसम्म तान्नसम्म नछाडेकी उनीसँगको स्क्रिन सेयरपछि अहिलेसम्म गम्भीर कन्ट्रोवर्सीमा जोगिँदै आएका अनमोल पनि पूजाकै लाइनमा जाने हुन् या पूजालाई आफ्नो लाइनमा ल्याउने हुन् त्यो त फिल्मको सहकार्य र त्यसले ल्याउने नतिजाले देखाउने छ नै।

असार १९, २०७९ आइतबार १९:०९:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।