विपिनले छाडेको छड्के-२ मा अनमोलले अभिनय गर्ने !

काठमाडौँ : अलि हजम गर्न ग्राहै हुने भए पनि अहिलेका चल्तीका कलाकार विपिन कार्कीको रेट बढेर एक फिल्मको ५० लाख पुगिसकेको छ। यसो दुख गर्ने हो भने एक फिल्म नै सकिने रकम हो नि यो।

पारिश्रमिक रेट बढे पनि उनलाई कामको प्रस्तावको कमी भने छैन। आजै बिहीबार उनले अभिनय गर्ने प्रसाद-२ को औपचारिक घोषणा भएको छ। छड्केमा पनि उनैले अभिनय गरेका थिए। त्यसका निर्माताले उनै विपिनलाई लिएर छड्के-२ बनाउन खोजे। तर विपिनको पारिश्रमिक सुनेर आत्तिए।

अहिले उनले यही फिल्ममा चकलेटी हिरोको छवि बनाएका अनमोल केसीलाई अनुबन्ध गरेका छन्। छड्के कमेडी शैलीमा बनेको ग्याङस्टरहरुको कथा थियो। अब यसको सिक्वेलको कथा के हुने हो खुलिसकेको छैन।

निर्माण टोलीले यसलाई छड्केको सिक्वेलको रूपमा प्रचार नगर्ने रणनीति बनाएका छन्। अब सिक्वेल भन्ने हो भने त छड्केकै फ्लेवर खोज्छन् दर्शकले। अनि कहाँको विपिन अनि कहाँको अनमोलको अभिनय क्षमता। यदि सिक्वेलको रूपमा दर्शकले यसलाई स्वीकार गरिदिए भने फिल्मको डुङा डुब्ने निश्चित छ। यो सिक्वेल हैन भन्दा दर्शकले पत्याए भने त्यो निर्माताको भाग्य।

असार १६, २०७९ बिहीबार १५:१४:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।