कमलपोखरीको माछा मरे

काठमाडौँ : काठमाडौँ महानगरपालिकाले आधुनिक रूपमा पुनर्निर्माण गरे पनि समयमै पोखरी सफा नहुँदा त्यहाँ छाडिएका माछाहरू मरेका छन्। पोखरी पुरै लेउले ढाकेपछि मात्रै महानगरले पोखरी सफा गर्न २ लाख बजेट दिएको छ।

मङ्गलवारबाट पोखरी सफा गर्ने काम भइरहेको छ। पोखरी सफा गर्दा त्यहाँ रहेका माछाहरू भने मरेर पोखरीको किनारामा तैरिरहेका छन्। कमल पोखरीमा कमल समेत उमार्न सकेको छैन महानगरले।

कमलपोखरीको सौन्दर्यकरण योजनाअन्तर्गत काठमाडौँ महानगरपालिकाले पोखरी पुनर्निर्माण गरेको थियो। करिब २३ रोपनी क्षेत्रफलमा पुनर्निर्माण भएको कमलपोखरीमा कङ्क्रिट प्रयोग गरिएको भए पनि मौलिक वास्तुकलामा आधारित फल्चाहरु समेत बनाइएको छ।

पोखरी पुनर्निर्माणमा करिब ६ करोड ३६ लाख खर्च भएको थियो। लकडाउन र कङ्क्रिटको प्रयोग गरेर पोखरी पुनर्निर्माण गरिएको भन्दै सम्पदा अभियन्ताले विरोध गरेपछि पोखरीको पुनर्निर्माण कार्यमा ढिलाइ भएको थियो।

असार ९, २०७९ बिहीबार १६:४३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।