मापसे गरेर मतदान अधिकृत, म्यादी र गाउँलेलाई कुट्ने सशस्त्र प्रहरीका सई पक्राउ

सुर्खेत : सुर्खेतको पञ्चपुरी नगरपालिका–७ धनबोटमा खटिएका मतदान अधिकृत, म्यादी प्रहरी र गाउँलेलाई कुटपिट गर्ने प्रहरीलाई नियन्त्रणमा लिइएको छ। धनबोटमा रहेको नेपाल राष्ट्रिय आवासीय विद्यालयको मतदान केन्द्रमा खटिएका वरिष्ठ सई (प्रहरी नायब निरीक्षक) नरेन्द्रप्रसाद भट्टले मतदान अधिकृत, सहायक मतदान अधिकृत र ड्युटीमा खटिएका म्यादी प्रहरीमाथि कुटपिट गरेका हुन्।

कुटपिटबाट केन्द्रका मतदान अधिकृत निरज झा, सहायक मतदान अधिकृत राजेन्द्र धमलासहित केही स्थानीय र म्यादी प्रहरीहरू सामान्य घाइते भएका छन्। बुधबार राति उनले मतदान अधिकृत, म्यादी प्रहरी र गाउँलेलाई कुटपिट गरेका थिए। उनलाई अहिले नियन्त्रणमा लिई आवश्यक कारबाहीका लागि प्रक्रिया अगाडि बढाइएको कर्णाली प्रदेश प्रहरीका निमित्त प्रमुख प्रहरी वरिष्ठ उपरीक्षक राजेशनाथ बास्तोलाले जानकारी दिए।

उनका अनुसार ती प्रहरीले मादक पदार्थ सेवन गरी मतदान केन्द्रमा पुगेर कुटपिट गरेका थिए। निर्वाचनका बेला प्रहरी कर्मचारीबाटै अमानवीय व्यवहार भएकाले सई भट्टलाई कारबाहीको प्रक्रिया सुरू गरिएको छ, एसएसपी बास्तोलाले भने, ‘निर्वाचनका बेला शान्ति सुरक्षामा खटिएका प्रहरी कर्मचारीबाटै यस्तो व्यवहार हुनु गलत हो, हामीले उनलाई नियन्त्रणमा लिइसकेका छौँ।’ 

उनलाई जिल्लामा ल्याउँदै आवश्यकताअनुसार निलम्बन गरेर कारबाही प्रक्रिया अगाडि बढाउने उनले बताए। मदिरा सेवन गरेका वरिष्ठ सई भट्ट बुधबार राति ११ बजेतिर धनबोट गाउँ पसेका थिए। त्यहाँ चार जना स्थानीयको घरभित्र पसेर हतियार देखाउँदै उनले कुटपिट गरेको स्थानीयले आरोप लगाएका छन्।

राति गाउँलेबाट लखेटिएपछि प्रहरी र म्यादी प्रहरीले उनलाई उद्धार गरी मतदान अधिकृतलगायतका कर्मचारी सुतेको घरमा ल्याएका थिए। त्यहाँ पुगेपछि उनले सुरमै मतदान अधिकृत र सहायक मतदान अधिकृतमाथि हातपात गरेका थिए।

कुटपिट गर्ने भट्ट सशस्त्र प्रहरी गण वीरेन्द्रनगरमा सहायक लेखा अधिकृत हुन्। उनलाई निर्वाचन सुरक्षाका लागि पश्चिम सुर्खेत खटाइएको थियो। बिहान ३ बजे मात्रै उनलाई प्रहरीले नियन्त्रणमा लिएको थियो।

वैशाख २९, २०७९ बिहीबार १५:१६:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।