कांग्रेस कार्यकर्ताले एमाले उम्मेदवार चढेको गाडीमा आक्रमण गरे
बुटवल : बुटवलमा नेपाली कांग्रेसका कार्यकर्ताहरुले एमालेका वडा अध्यक्षका उम्मेदवारको गाडीमा आक्रमण गरेका छन्। बुटवल उपमहानगरपालिका वडा नं. १२ का वडा अध्यक्षका उम्मेदवार देवी रेग्मी सवार रहेको वा २० च ६७८५ नम्बरको गाडीमा सोमबार साँझ ८ बजेतिर कांग्रेसका कार्यकर्ताले आक्रमण गरेका हुन्।
बुटवल १२ नयाँगाउँ चोकमा ६१८३ नं.को स्कुटरमा आएका तीन जनाको समुहले एकाएक गाडीमाथी ढुंगा प्रहार गरेका थिए। उनिहरुको ढुंगा प्रहारबाट गाडीको अगाडीको शिशा फुटेको छ। आक्रमणपछि गाडीलाई प्रहरीले सुरक्षामा राखेको छ भने आक्रमणमा संलग्नहरु फरार रहेको प्रहरीले जनाएको छ।
नेकपा एमाले रुपन्देहीका अध्यक्ष तेजेन्द्र केसीले बुटवल उपमहानगरपालिकामा नेपाली कांग्रेसले आफू पराजित हुने निश्चित भएपछि एमालेका उम्मेदवार माथी सांघातिक आक्रमणमा उत्रिएको बताए।
केसीले एमालेले नगरप्रमुख उपप्रमुख सहित वडा अध्यक्ष र सदस्यहरु जित्ने निश्चित भएपछि नेपाली कांग्रेस पराचित मानसिकतामा पुगेको भन्दै यस्ता घृणित कार्यहरु तत्काल रोक्न र आक्रमणकारीहरुलाई पक्राउ गरि कारवाही गर्न स्थानीय प्रशासनलाई आग्रह गरे।
निर्वाचनमा पराजित हुने भएपछि नेपाली कांग्रेसका कार्यकर्ताहरु सुनियोजित रुपमा एमालेका उम्मेदवारमाथी नै आक्रमणमा उत्रिनु निन्दनिय भएको उल्लेख गर्दै यस्ता घटनाबाट विचलित नभई निर्वाचन लक्षित कार्यक्रममा केन्द्रित हुन एमाले नेता कार्यकर्ताहरुलाई उनले आग्रह गरेका छन्। केसीले विपक्षीहरुको घृणित कार्यबाट उत्तेजित नभई संयमता पुर्वक मतदाताको घर–घरमा पुग्न कार्यकर्तालाई आग्रह गरे।
जिल्ला प्रहरी कार्यालय रुपन्देहीका प्रमुख प्रहरी उपरिक्षक रविन्द्र रेग्मीले घटनाबारे आफूलाई बुटवल प्रहरीले हालसम्म जानकारी नगराएको र घटनाबारे बुझ्ने बताए।
वैशाख २६, २०७९ सोमबार २१:०९:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
