आरआरआरमा आलियाको आरोपबारे राजामौलीले भने' छोटो भूमिकाबारे उनी जानकार थिइन्

एजेन्सी : फिल्म 'आरआरआर' मा बलिउड अभिनेत्री आलिया भट्टको अभिनयलाई दर्शकले रुचाएनन्। उनी कतिखेर स्क्रिनमा आइन् अनि कतिखेर हराइन् धेरै दर्शकका लागि चासो पनि भएन। फिल्म सुपर हिट भयो। तर आलियाले सोचेजस्तो क्रेडिट पाइनन्।

फिल्म रिलिज भए लगत्तै उनले आफ्नो सामाजिक सञ्जालमा आरआरआरको प्रमोसनका लागि राखेका पोस्टहरू डिलिट मात्र गरिनन् आरआरआरका निर्देशक राजामौलीलाई अनफलो नै गरिन् इन्टाग्राममा। यसले आलिया राजामौलीसँग रिसाएको पुष्टि भयो।

रिसाउनुको कारण के? फिल्मको सुटिङको बेलामा टन्नै खिचेर पछि फिल्ममा छोटो रोल मात्र राखेको आलियाको पक्षबाट दाबी आयो। तर फिल्मको कथावस्तु हेर्दा उनले जति रोल पाएकी छिन् त्यो उनकै लागि मात्रै थपिएको प्रस्टै देखिन्छ। जति सिन छ त्यो पनि बढी देखिन्छ।

तर के राजामौलीले आलियालाई धेरै सुटिङ गराएर रोल काटेको हो त? यसबारे उनले भर्खर मुख खोलेका छन्। राजामौलीले यस विवादबारे बोल्दै फिल्ममा आलियाले जुन भूमिका निभाएको हो त्यसका लागि त्यति नै रहेको र धेरै सुटिङ गरेर पछि नकाटिएको दाबी गरे।

उनले आलियाले फिल्म साइन गर्नु अगाडि पनि यसबारे जानकारी रहेको र फिल्मको योजना अनुसारै उनलाई अनुबन्ध गरेको भन्दै भोलिका दिनमा पनि उनीसँग काम गर्न आफू इच्छुक रहेको बताएका छन्।

उनले आलियाले निभाएको भूमिकाको फिल्ममा खास महत्त्व रहेको समेत बताए। उनले फिल्मको कहानी अनुसारै कलाकारको पहिल्यै भूमिका तय गरिएको र सुटिङपछि कसैको भूमिका पनि छोटो नबनाएको समेत दाबी गरेका थिए।

वैशाख १४, २०७९ बुधबार १६:२९:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।