अभिनेत्री शिल्पासँगको सम्बन्धमा ब्रेक लागेसँगै सुस्ताएका छवी

काठमाडौँ : अभिनेत्री शिल्पा पोखरेलसँग वैवाहिक यात्रामा ब्रेक लागेसँगै निर्माता छविराज ओझाको फिल्मी यात्रामा पनि ब्रेक लाग्यो। उनी फिल्म निर्माण क्षेत्रमा फर्कनै सकेनन् यो पारिवारिक तनावले।

पहिलो पटक थिएन उनको वैवाहिक यात्रामा ब्रेक लागेको। यो तेस्रो थियो। यस अगाडि अर्की अभिनेत्री रेखा थापासँगको यात्रा पनि यसरी नै ब्रेक लागेको थियो। रेखासँगको यात्रा टुङ्ग्याउँदा सहमतिमै सबै सुल्टिदा उनलाई फिल्मी क्षेत्रमा फर्कन त्यति सकस भएन। तर शिल्पासँगको सम्बन्ध टुट्दा भने उनलाई सहज भएन।

अहिले पनि यी दुवैको छोड पत्र सम्बन्धी मुद्दा अदालतमा विचाराधीनै छ। शिल्पाले अंश माग गरेकी छिन्। सायद यसले पनि हो कि उनी फिल्म बनाउने काममा फर्कन सकेनन्। मंगलम फिल्म बनाएपछि उनी सुस्ताए।

अहिले आएर उनी फिल्म निर्माणमा कम ब्याक गर्ने तयारीमा छन्। उनी निकटहरूको दाबी पत्याउने हो भने उनी एक मात्रै हैन पाँच-पाँच फिल्म बनाउने योजनामा छन्। पाँच वटै फिल्मको स्क्रिप्टको काम सक्काइसकेका छन् उनले।

उनी अहिले फिल्मका लागि नयाँ कलाकारको खोजीमा छन्। त्यसका लागि केही मोडलहरूसँग संवादमा छन् रे उनी। तर ती नयाँ कलाकार को हुने हुन् टुंगो भने भइसकेको रहेनछ।

वैशाख १३, २०७९ मंगलबार १६:३९:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।