साउथ फिल्मका हिरोइनहरू: समान्था सबैभन्दा महँगो, अरूको पारिश्रमिक कति ?
एजेन्सीः पुष्पा, आरआरआरदेखि केजीएफ २ ले पुष्टि गर्छ, नेपालमा साउथ इण्डियन फिल्मको क्रेज। विशेषगरी साउथ फिल्मका हिरोहरू हुन्, नेपाली दर्शकको रोजाइ।
तर, त्यो उद्योगको हिरोइनहरू पनि नेपाली दर्शकमाझ परिचित छन्। परिचित मात्र होइन, फ्यान नै छन् नेपाली दर्शकहरू।
समान्था रुथ प्रभु, काजल अग्रवाल, रश्मिका मण्डना, नयनतारा, अनुष्का सेट्टी, पूजा हेगडे लगायत चर्चित अनुहार हुन् साउथ फिल्मका।
तीमध्ये समान्था अहिलेकी सबैभन्दा महँगो पारिश्रमिक लिने साउथ हिरोइन हुन्। उनले पुष्पा फिल्मको 'ऊ अन्टावा' गीतका लागि मात्र ५ करोड भारु लिएको खबर सार्वजनिक भएको थियो। उनले एउटा चलचित्रमा काम गरेबापत ८ करोड भारुसम्म लिने गरेकी छिन्।
त्यस्तै नयनतारा दोस्रो महँगो हिरोइन हुन्। उनको पारिश्रमिक ७ करोड भारु छ। तेस्रो महँगो हिरोइन हुन्- अनुष्का सेट्टी। बाहुबलीबाट फेममा आएकी अनुष्काको पारिश्रमिक ६ करोड भारु हो।
राधेश्याम चलचित्र फ्लप भए पनि यसकी नायिका पूजा हेगडे साउथकी चर्चित कलाकार हुन्। उनको पारिश्रमिक फिल्मअनुसार घटबढ भइरहन्छ। उनले ३ देखि ७ करोडसम्म लिने गरेकी छिन्।
यस्तै पुष्पाकी हिरोइन रश्मिका अहिलेकी सबैभन्दा चर्चित नायिका हुन्। गुगलकै नेशनल क्रश रश्मिकाको पारिश्रमिक भने थोरै नै छ। उनले अढाइ करोड भारु मात्र लिने गरेको भारतीय सञ्चारमाध्यमहरूले जनाएका छन्।
सुन्दरता र अभिनयकी खानी काजल अग्रवाल पनि महँगी नायिका नै हुन्। उनको पारिश्रमिक एउटा फिल्ममा डेढदेखि चार करोडसम्म हुने गरेको छ।
वैशाख १२, २०७९ सोमबार १०:२५:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
