कर्णालीका पर्यटन मन्त्री कार्चेन चढेको गाडी दुर्घटना, मन्त्री सकुशल
सुर्खेत : कर्णाली प्रदेशका उद्योग, वन, पर्यटन तथा वातावरण मन्त्री छिरिङ डम्डुल लामा ‘कार्चेन’ चढेको गाडी दुर्घटनामा परेको छ। सुर्खेत–दैलेख सडक खण्डको वीरेन्द्रनगर नगरपालिका–७ कपासेमा मन्त्री चढेको गाडीलाई विपरीत दिशाबाट आएको बोलेर जीपले ठक्कर दिएको हो।
वीरेन्द्रनगर नगरपालिका–१४ गढीमा रहेको होटेल भ्याली भ्युमा मन्त्रालयद्वारा आयोजित योजना तर्जुमा कार्यक्रममा सहभागी हुन जाँदै गर्दा दुर्घटना भएको जिल्ला ट्राफिक प्रहरी कार्यालय सुर्खेतले जनाएको छ।
मन्त्री चढेको कर्णाली प्रदेश ००१ झ ००७६ नम्बरको गाडीलाई विपरीत दिशाबाट आएको भे १ च २४७४ नम्बरको बोलेरो जीपले ठक्कर दिएको हो।
कार्यालय स्रोतका अनुसार ठक्करबाट मन्त्री सवार गाडीको चालक बस्ने साइडमा क्षति पुगेको छ। दुर्घटनापछि मन्त्री कार्चेन अर्को गाडिमा कार्यक्रममा गएका थिए। बलेरो जिप चालक वीरेन्द्रनगर नगरपालिका–३ का ३८ वर्षी प्रकाश अधिकारीलाई अनुसन्धानका लागि ट्राफिक प्रहरीले नियन्त्रणमा लिएको छ।
वैशाख ६, २०७९ मंगलबार १८:४०:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
