शिक्षकले यौन दुर्व्यवहार गरेको भन्दै गैँडाकोटको जनक माविका विद्यार्थी आन्दोलित

चितवन : कक्षा १२ मा अध्ययनरत विद्यार्थीमाथि शिक्षकले यौन दुर्व्यवहार गरेको भन्दै नवलपरासीको गैँडाकोटमा रहेको जनक माध्यमिक विद्यालयका विद्यार्थीले आन्दोलन गरेका छन्।

विद्यालयका शिक्षकले एक छात्रालाई अश्लील भिडियो देखाउने र संवेदनशील अङ्गमा छुने गरेको भन्दै विद्यार्थीले विद्यालयमै विरोध प्रदर्शन गर्दै शिक्षकमाथि आक्रमणको प्रयास गरेका थिए।

विध्यार्थीहरुले विद्यालय परिसरमा रहेको विद्यालयका प्रधानाध्यापक र आरोपी शिक्षकको मोटरसाइकल जलाएका छन्। विद्यार्थीले आरोपी शिक्षकलाई आक्रमणको प्रयास गरेपछि प्रहरीले उनलाई लुकाएपछि विध्यार्थीहरुले प्रहरीमाथि ढुङ्गा प्रहार गरेका थिए।

विद्यार्थीको ढुङ्गा लागेर चार जना प्रहरी घाइते भएका छन्। प्रहरीले हवाई फायर र लाठी प्रहार गरेर विद्यार्थीलाई तितरबितर पारेको छ। यस अगाडि मकवानपुरको एक विद्यालयका शिक्षकमाथि पनि यौन दुर्व्यवहारको आरोपमा विध्यार्थीहरुले विद्यालय नै तोडफोड गरेका थिए।

वैशाख ४, २०७९ आइतबार १७:०४:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।