'पुष्पा'की रश्मिका थलापति विजयसँग फिल्म खेल्दै
एजेन्सीः 'डियर कमरेड' हुँदै 'पुष्पा' फिल्मबाट चौतर्फी फ्यान बटुल्न सफल अभिनेत्री हुन्- रश्मिका मन्दना। यस्तै दक्षिण भारतीय चलचित्र उद्योगका सुपरस्टार हुन्- थलापति विजय।
यी दुवै अब नयाँ फिल्ममा सँगै देखिने भएका छन्। फिल्मको नाम फाइनल त गरिएको छैन तर हाललाई 'थलापति ६६' राखिएको छ।
केही दिनअघि चेन्नाईमा चलचित्रको मुहुर्त गरिएको थियो। अनि रश्मिकाले समारोहको केही तस्बिरहरू आफ्नै इन्स्टाग्राममार्फत सार्वजनिक गरिन्। र लेखिन्, 'छुट्टै महसुस भइरहेको छ। सर (विजय)लाई वर्षौँदेखि हेर्दै आएकी हुँ। अब गर्न मन लागेका सबै कुराहरू गर्न पाउँदैछु। उहाँसँग अभिनय गर्न, नाच्न, नजर जुधाउन, बोल्न सबैथोक। एकदम खुशी।'
डियर कमरेडले फ्यानमाझ छुट्टै पहिचान बनाउन सफल रश्मिकाको जीवनमा पुष्पा फिल्म बरदान नै सावित भयो। अब त रश्मिका बलिउड डेब्यु गर्न समेत लागेकी छिन्। सिद्धार्थ मल्होत्राको मुख्य भूमिका रहने चलचित्र 'मिसन मजनु'बाट उनी बलिउड प्रवेश गर्न लागेकी हुन्।
यता विजयको पनि 'बिस्ट' चलचित्र यही अप्रिल १३ मा रिलिज हुँदैछ। बिस्टमा विजयको अपोजिटमा पूजा हेगडे छिन्।
चैत २६, २०७८ शनिबार १३:४४:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
