केजीएफ- २: बुकिङमै तोड्यो सबै भारतीय फिल्मको कीर्तिमान

एजेन्सीः बहुप्रतीक्षित चलचित्र हो- केजीएफ २। भारत र विश्वका थुप्रै देशका बक्स अफिसमा तहल्का मच्चाउने आकलन गरिएको केजीएफ २ ले बेलायतको बक्स अफिसमा बुकिङको समयमै कीर्तिमान बनाएको छ।

बेलायतमा बुकिङ खुलाइएको पहिलो १२ घण्टामा पाँच हजारभन्दा बढी दर्शकहरूले बुकिङ गरेका छन्। भारतीय सञ्चारमाध्यमका अनुसार बेलायतमा यति कम समयमा यति धेरै टिकट बिक्री भएको यो नै पहिलो भारतीय फिल्म हो। हालसम्म कुनै पनि भारतीय फिल्मका लागि १२ घण्टामा पाँच हजारभन्दा बढी टिकट बिक्री भएको थिएन।

यता केजीएफ २ को भारतभित्र हिन्दी डबको पनि १२ घण्टाको अवधिमा एक लाख सात हजार टिकट बिक्री भएको थियो।

स्क्रिनको कुरा गर्दा केजीएफ २ लाई एउटा चुनौती भने रहेको छ। अप्रिल १४ मा केजीएफसँगै रिलिज हुँदै छ- शाहीद कपूरको 'जर्सी' र दक्षिण भारतीय स्टार विजयको 'बिस्ट'। केजीएफ २ ले नर्थ इण्डियामा शाहीदको जर्सीसँग भिड्नुपर्नेछ। साउथमा विजयको बिस्टसँग।

तामिल नाडूलगायत दक्षिण भारतकै केही राज्यमा अभिनेता विजयको फ्यान फलोइङ धेरै छ। तामिल नाडूमा त करिब एक हजार स्क्रिन बिस्टले पाएको छ।

यता नर्थ इण्डियामा भने केजीएफ २ ले तीन हजारभन्दा बढी स्क्रिन पाएको छ। अनुमानित तथ्याङ्कअनुसार नर्थ इण्डियामा केजीएफ २ ले ६० प्रतिशत स्क्रिन पाउँदा जर्सीले ४० प्रतिशत पाएको छ।  

चैत २५, २०७८ शुक्रबार ०९:३२:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।