दुर्गेशमाथि जोक बनाउँदा विवादमा कमेडी च्याम्पियन, दृश्य नै काटियो
काठमाडौँ : कमेडी क्लब विथ च्याम्पियन दोस्रो एपिसोडमै विवादमा तानिएको छ। कमेडी नाइटविथ कपिलको फर्म्याट कपी गरे पनि कन्टेन्टमा ध्यान पुर्याउन नसक्दा दोस्रो एपिसोडै कार्यक्रम विवादमा तानिएको हो।
नाबालिग बलात्कार केसमा पुर्पक्षका लागि थुनामा रहेका पल शाहसँग जोडिएका दुर्गेश थापाको कटआउट राखेर जोक बनाउँदा कार्यक्रम विवादमा तानियो। गाली पचाउन सिकाउने गुरु अनि यस्तो साथी त कसैको नहोस् भन्दै कमेडियन सजन श्रेष्ठले दुर्गेशलाई उडाएको प्रोमो आए लगत्तै कार्यक्रमबारे विवाद सुरु भयो।
कार्यक्रममा युट्युबर पुन्य गौतमलाई पनि उडाइएको थियो। तर पलको मुद्दा पुर्पक्षमा रहेको र मुद्दासँग जोडिएका कसैमाथि पनि नकारात्मक टिप्पणी नगर्न जिल्ला अदालत तनहुँले आदेश दिएको थियो।
दुर्गेश पनि यो केसमा जोडिएका छन्। विवाहबारे भएको छलफल र पललाई मेसेज पठाउन भएको छलफलको अडियो सार्वजनिक भएपछि पक्ष समर्थकले उनको आलोचना गरेका थिए। प्रहरीले उनको बयान लिएको थियो।
राष्ट्रिय सरकारी टेलिभिजन नेपाल टेलिभिजनबाट प्रसारण हुने कार्यक्रममा चलिरहेको केसबारे नै मजाक बनाएपछि दुर्गेशले केस हाल्ने चेतावनी दिएपछि प्रोमोमा रहेको दुर्गेशको अंश युट्युबबाट हट्यो। तर टिकटकतिर किएड्भर्टाइजिङको खातामा अझै त्यही प्रोमो नै छ।
प्रोमो मात्र हैन सोमवार प्रसारित कार्यक्रममा पुन्य र दुर्गेशको अंश नै हटाइयो। कट आउटको प्रहसनमा विशाल भण्डारीको मात्र देखाइयो। कार्यक्रममा सजन निकै लाउड पनि सुनिन्छन्। अन्य सहभागीको प्रस्तुति ठिकै देखिएको छ।
चैत १५, २०७८ मंगलबार ००:४७:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
