क्या जोक : डान्स रियालिटी शोमा राजेश हमाल विशेष गेस्ट !

काठमाडौँ : सङ्गीतको कार्यक्रममा बेसुरको विशेष अतिथि भयो भने के होला ? खुरुक्क मञ्चमा बसे त ठिकै होला गाउन थाले भने ! यस्तै त देखियो डान्सिङ रियालिटी शो डान्सिङ स्टार नेपालमा।

आफ्नै समयमा पनि नचाउन अति कठिन नायकको रूपमा परिचित हुन् राजेश हमाल। धेरै कोरियोग्राफरको नचाउन कठिन नायकको सूचिमा उनको नाम छ। उनै भए डान्सिङ स्टार नेपाल सिजन २ को विशेष अतिथि। लायक हुन् विशेष अतिथिको। महा नायक हुन्। तर मञ्चमा ननाचेको भए उत्तम हुन्थ्यो।

जसरी कार्यक्रमको पहिलो एपिसोडका कार्यक्रम सञ्चालकहरूले कार्यक्रम अवधिभर महा नायकको महानायक भने त्यसले कार्यक्रममा आउने हमालको सर्त नै यति पटक महानायक भन्नुपर्ने थियो कि झैँ नलाग्ने पनि हैन।

अनि नाम डान्सिङ स्टार नेपाल। तर अधिकांश सहभागी आफैले आफ्नो परिचय दिनुपर्ने खालको पपुलारिटी नि देखियो। स्टार नेपालकै भए त चिन्नुपर्ने हो। एकाध बाहेक ग्राहै देखियो स्टारलाई चिन्न।

कार्यक्रमका जज उहीँ रेनशा राई राना, गौरी मल्ल अनि दिलीप रायमाझी। यी तीनै परिचित सेलिब्रिटी नै हुन्। रेनशा कोरियोग्राफर, गौरी र दिलीप कलाकार।

सहभागीमा धिरज राई, पारमिता आरएल राना, समायरा श्रेष्ठ, प्रीति आले र भगवती खड्का अनि वन एन्ड वन्ली कन्ट्रोवर्सी गर्ल सोनिका रोकाय सहजै परिचित स्टार देखिए। अन्य परिचय दिएपछि हुने स्टार।

कोरियोग्राफर लाउरे सिंह र अनुजा अग्रवालको जोडी धिरज राई र काजल कर्ण। जेडी तमु र सुनिता दर्नालको जोडी पारमिता राना र सन्तोष उपाध्याय। सञ्जय लामा र स्वेत्ना योन्जनको जोडी समायरा श्रेष्ठ र प्रदीप बास्तोला भए।

यसै गरी कोरियोग्राफर शेखर घर्ती मगर र सुनिल बिकको स्टार जोडी गायिका प्रीति आले मगर र रेस्लर भगवती खड्का भए भने बेबिका खत्री र सरोज प्रजाको स्टार जोडी टिकटकर अमर-अमृत र छिरिङ शेर्पा भए। अनि दिलीप ओखडा र रबी पटेलको जोडी सोनिका रोकाय र निलम।

जाँदाजाँदै अन्त्यमा दोहोर्याएर अभिनेता हमालले नाचे र ग्रान्ड ओपनिङ झुरै बनाईछाडे। 

चैत १२, २०७८ शनिबार ०२:१२:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।