अभिनेत्री वर्षाले भाउ खोज्दा उपासनालाई फाइदा

काठमाडौँ : फिल्मको अफर कम भए पनि केही कलाकारहरूको भाउ खोज्ने बानी नबलिदिँदा उनीहरूको करिअरै सङ्कटमा पार्ने गरेका छन्। त्यस्तै कलाकारको सूचीमा परेकी छिन् अभिनेत्री वर्षा राउत। एक त फिल्मको अफरै कम छ। अर्को बेलाबेलामा विवादित बयान दिइरहने बानी। त्यसमा पनि भाउ खोजी रहने उनको स्वभाव।

यही स्वभावले उनी फिल्म ' २ नम्बरी' बाट आउट भएकी छिन्। नाबालिग बलात्कारको आरोपमा प्रहरी हिरासतमा पुगेपछि पल शाहको ठाउँमा सौगात मल्ल आएको फिल्ममा अब वर्षाको ठाउँमा उपासना सिंह ठकुरी आएकी छिन्।

निर्माण स्रोतका अनुसार वर्षा फिल्मबाट बाहिरिनुको कारण उनले बेलाबखत राखिरहने डिमान्ड नै हो। निर्माण टोली चैत १५ बाट फ्लोरमा जाने तयारी गरिरहेको बेला उनले समय छैन भन्दै फिल्मको सेड्युल नै पर सार्न दबाब दिइन्।

एक त पलको ठाउँमा सौगात आएपछि निर्माण टोली उनको जोडी सुहाउने अभिनेत्री राख्न पाए हुने भन्नेमा थिए। त्यही बेला वर्षाले पनि भाउ खोज्न थालिन्। पहिल्यै चैत १५ बाट फिल्मको छायाङ्कन हुने जानकारी गराउँदा पनि बहाना बनाउन थालेपछि निर्माण टोलीले पनि मौका पायो अभिनेत्री बदल्ने। अनि उनीहरूले वर्षासँग भएको सम्झौता रद्द गर्दै उपासनासँग सम्झौता गरे।

फिल्ममा मल्ल र उपासनासँगै दयाहाङ राई र भुटानी नायिका उगेन छोदेन छन्। फिल्म दीपेन्द्र लामाले निर्देशन गर्न लागेका हुन्।

चैत ७, २०७८ सोमबार १९:००:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।