आफ्नै ओटीटी प्ल्याटफर्म सुरु गर्दै शाहरुख खान, बधाई दिँदै सलमानले भने 'आजको पार्टी तेरोतर्फबाट'

एजेन्सीः पछिल्लो वर्षयता विश्वभर नै ओटीटी (ओभर द टप) प्ल्याटफर्मको प्रयोग मौलाएको छ। नेटफ्लिक्स, अमेजन प्राइम, डिज्नी प्लसले विश्व मनोरञ्जन बजारमा तहल्का मच्चाइरहेको बेला अब अर्को पनि थपिने भएको छ।

बलिउड अभिनेता शाहरुख खानले आफ्नै ओटीटी ल्याउने भएका हुन्। उनको ओटीटी प्ल्याटफर्मको नाम हुनेछ- एसआरके प्लस।

'ओटीटीको दुनियाँमा केही हुनेवाला छ' भन्दै उनले 'एसआरके प्लस कमिङ सुन' लेखिएको तस्बिर पनि सार्वजनिक गरेका छन्। यद्यपि, यस ओटीटीमा कस्ता कन्टेन्ट हुनेछन् र कहिलेबाट सुरु हुनेछ भन्ने जस्ता जानकारी भने दिइएको छैन।

हुन त शाहरुखले निकै कुरा लुकाएका थिए। यो एप नै रहेको पुष्टि चाहिँ सलमान खानले गरेका हुन्। उनले प्रष्टसँग शाहरुखको ट्वीटमाथि कोट ट्वीट गर्दै भने, 'आजको पार्टी तेरोतर्फबाट। नयाँ ओटीटी एपको लागि बधाई छ, एसआरके प्लस।'

भारतीय सेलिब्रिटीहरू विस्तारै आफ्नै ओटीटी बनाउनेतर्फ लागिरहेका छन्। यसअघि नै अनुष्का शर्मा र प्रख्यात यशराज ब्यानर्सले आफ्नै ओटीटी सुरु गर्ने बताइसकेका छन्।

चैत २, २०७८ बुधबार ०८:४९:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।