मोटरसाइकल दुर्घटनामा वाइसिएल नेता पौडेलको मृत्यु, भिरमा भेटियो शव
पोखरा : मोटरसाइकल दुर्घटनामा नेकपा माओवादी केन्द्र निकट योङ कम्युनिस्ट लिग (वाइसिएल)का नेता सुवास पौडेलको मृत्यु भएको छ। शुक्रवार साँझ स्याङ्जाको भालु पहाड सडक खण्डमा आफैले हाँकेको मोटरसाइकल चिप्लिएर भीरबाट खस्दा उनको मृत्यु भएको हो।
फेदी खोला गाउँपालिका–४ आरु खर्क स्थायी घर भएका पौडेलको हिजो साँझ वाइसिएल स्याङ्जाको बैठकमा भाग लिएर सर्केटारीस्थित घर जानेक्रममा मोटरसाइकल सडकबाट चिप्लिएर अन्दाजी १५० मिटर तल खसेर भिरमा अल्झिएको अवस्थामा भेटिएको प्रहरीले जनाएको छ।
पौडेल वाइसिएलको केन्द्रीय स्वास्थ्य विभाग प्रमुख समेत हुन्। सिद्धार्थ राजमार्गको फराकिलो बनाउने काम भइरहेको खण्डमा पौडेलको मोटरसाइकल चिप्लिएको हुनसक्ने प्रहरीको प्रारम्भिक अनुमान छ।
पौडेल मोटरसाइकलमा एक्लै भएकाले तत्काल घटनाका बारेमा थाहा नपाइएको बताइएको छ। अहिले घटनास्थलमा भिरमा अड्केको पौडेलको शव निकाल्ने प्रयास भइरहेको प्रहरीले जनाएको छ।
फागुन १४, २०७८ शनिबार १८:४१:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
