माफिया क्विनको अवतारमा आलिया

काठमाडौं : बलिउड अभिनेत्री आलिया भट्ट यतिबेला फिल्म 'गंगुबाई काठियावाडी' का कारण चर्चामा छिन्। यो फिल्मको ट्रेलर रिलिज भएपछि आलियाको अभिनयको सबैतिर प्रशंसा भइरहेको छ।

फिल्ममा आलियाले मुम्बईकी माफिया क्विन गंगुबाईको भूमिका निभाएकी छिन्। उनको भूमिका निकै दमदार रहेको भारतीय समाचार एजेन्सीहरुले जनाएका छन्। उनको अलग-अलग रुप यतिबेला इन्टरनेटमा पनि छाइरहेको छ।

'गंगुबाई काठियावाडी' हुसेन जैदीले लेखेको किताब 'माफिया क्विन अफ मुम्बई' मा अधारित फिल्म हो। जैदीले आफ्नो यो किताबमा गुजरातको काठियावाडी निवासी महिला गंगा हरजीवनदासको सिंगो जीवन उतारेका छन्, जसको जिन्दगीमा सबैलाई झस्काउने थुप्रै दुर्घटना भएका थिए।

आलियाले गंगुबाईको भूमिकाका लागि थुप्रै पूर्वतयारी गरेकी थिइन्। उनले एक अन्तर्वार्तामा बताएकी थिइन्, 'मैले आफ्नो भूमिकाको तयारीका लागि थुप्रै पुराना हिन्दी फिल्म समेत पटक-पटक हेरेकी थिएँ।'

गंगुबाई काठियावाडीको निर्देशन बलिउडका प्रख्यात निर्देशक सञ्जयलिला भन्सालीले गरेका हुन्। फिल्ममा आलियाका अलावा अजय देवगन, विजय राज तथा सीमा पाहवाको मुख्य भूमिका रहेको छ। 

फागुन ५, २०७८ बिहीबार १४:३१:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।