वैशाख ३ गते काठमाडौं आउँदैछन् सलमान खान
काठमाडौंः बलिउड अभिनेता सलमान खान नेपाल आउने भएका छन्। वैशाख ३ गते काठमाडौंको दशरथ रङ्गशालामा हुने एक साङ्गीतिक कार्यक्रममा सलमान सहभागी हुने भएका हुन्।
सलमानसँगै सोही कार्यक्रममा बलिउड अभिनेत्री सोनाक्षी सिन्हा, ज्याकलीन फर्नान्डिज, निर्देशन तथा कोरियोग्राफर प्रभु देवा, मनिष पौललगायत सहभागी हुने भएका छन्।
यी कलाकारलाई नेपाल ल्याउने काम भने ओडीसी एन्टरटेन्मेन्टले गरिरहेको छ। यसका प्रबन्ध निर्देशक सीमान्त गुरुङले सलमानसहितका कलाकारलाई नेपाल ल्याउने सबै तयारी पूरा भइसकेको जनाएको छ।
२०७४ को फागुनमै ओडीसीले सलमान खानलाई नेपाल ल्याउने तयारी गरेको थियो। त्यतिबेला ‘दबंग: द सलमान खान लाइभ इन नेपाल’ शो आयोजना गर्ने भनिए पनि विभिन्न विवादका कारण कार्यक्रम आयोजना हुन पाएको थिएन।
ओडीसीले यसअघि सन् २०११ मा विश्वचर्चित क्यानेडियन गायक ब्रायन एडम्सलाई नेपाल ल्याएको थियो।
फागुन ४, २०७८ बुधबार २२:४५:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
