कमला नदीमा मेला हेर्न आएका दुई भारतीयकाे ट्याक्टर दुर्घटना हुँदा मृत्यु, २० घाइते
धनुषाः ट्याक्टर दुर्घटना हुँदा जिल्लामा दुई जनाको मृत्यु भएको छ। यस्तै साेही दुर्घटनामा २० जना घाइते भएका छन्।
जिल्ला प्रहरी कार्यालयका अनुसार गए राति विदेह नगरपालिका–७ बेलापट्टी सडकखण्डमा नम्बर प्लेटबिनाकाे (अनटेस्ट) ट्याक्टर पल्टिएको हो। सो दुर्घटनामा परी भारतको विहार राज्य सितामढीका ६० वर्षीय रामदयाल राय यादव र ४५ वर्षीया अम्बिका देवीको मृत्यु भएको छ।
जिल्ला प्रहरी कार्यालयका प्रहरी प्रवक्ता प्रहरी नायब उपरीक्षक जीतेन्द्रकुमार बस्नेतका अनुसार भारतबाट कमलाको मेला हेर्न आइरहेको ट्याक्टर ओभरटेक गर्ने क्रममा दुर्घटनामा परेको हो। उनीहरू धनुषा र सिरहाको सीमामा पर्ने कमलाखोलाको भूत मेला हेर्न तथा स्नानका लागि आउँदै थिए।
घाइतेहरूको प्रादेशिक अस्पताल जनकपुरमा उपचार भइरहेको छ। घाइते सबै भारतीय छन्। घाइतेमध्ये केहीको अवस्था गम्भीर रहेको प्रहरीले जनाएको छ।
मंसिर ३, २०७८ शुक्रबार १०:२४:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
