मुगु सदरमुकाम गमगढीमा आगलागी हुँदा २१ घर जले

सुर्खेतः मुगुको सदरमुकाम गमगढी बजारमा आगलागी हुँदा २१ घर जलेर नष्ट भएका छन्। छायाँनाथ रारा नगरपालिका—१ स्थित पुरानो बजारका ठिल्ले लामाको घरमा बालिएको दियोबाट आगलागी भएको मुगुका प्रमुख जिल्ला अधिकारी रोम बहादुर महतले जानकारी दिए।

‘गमगढीको मुख्य बजार क्षेत्रमा राती १२ः३० मा स्थानीय ठिल्ले लामाको घरमा बालेको दियोबाट आगलागी हुँदा २१ घर जलेर नष्ट भएका छन्,’ प्रमुख जिल्ला अधिकारी महतले भने, ‘आगो नियन्त्रणमा लिइए पनि घरहरू बाक्लो भएका कारण धुवाँ भने निस्किरहेको छ।’

उनका अनुसार साँघुरो बाटो, काठबाट निर्मित कच्ची घरहरू एकअर्कासँग जोडिएकाले पनि क्षति धेरै भएको हो। मुगुमा दमकल नहुँदा आगो नियन्त्रणमा कठिनाइ भएको उनले बताए।

आगलागीबाट मानवीय क्षति नभए पनि कराडौं मूल्य बराबरको धनमाल जलेर नष्ट भएको अनुमान गरिएको छ।

कात्तिक ३०, २०७८ मंगलबार ०८:३३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।