सुर्खेतबाट काठमाडाैं आउँदै गरेकाे बसमा आगलागी, यात्रु सकुशल
काठमाडाैंः सुर्खेतबाट काठमाडाैंतर्फ आइरहेकाे यात्रुवाहक बसमा आज बिहान आगलागी भएकाे छ। पृथ्वी राजमार्गअन्तर्गत धादिङकाे गजुरी गाउँपालिका–१ गजुरीबजारमा गुडिरहेका बसमा आज बिहान आगलागी भएको हाे।
जिल्ला प्रहरी कार्यालय धादिङका प्रहरी नायब उपरीक्षक जागेश्वर भण्डारीका अनुसार ना६ख १४७१ नम्बरको यात्रु बसमा एक्कासी आगलागी भएको हाे।
३६ जना यात्रु रहेको बसमा सबै यात्रु सकुशल रहेका छन्। तर बसमा रहेको सामान भने जलेर नष्ट भएको छ।
बसको इन्जिनबाट धुँवा निस्किनेबित्तिकै बस रोकेर यात्रुलाई बाहिर निकालेका कारण मानवीय क्षति हुन नपाएको प्रहरीले जनाएको छ। राजमार्ग क्षेत्रमा रहेको दमकल र स्थानीयबासीकाे सहयाेगमा आगो नियन्त्रणमा लिइएकाे थियाे।
कात्तिक ७, २०७८ आइतबार ०८:३२:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
