जाजरकोटमा भरुवा बन्दुक बोकेर सिकार खेल्दै गरेका पक्राउ 

एउटा सिकार खेल्दै गरेको अवस्थामा र तीन वटा घरमा लुकाइछिपाई राखेको भरुवा बन्दुक सहित दुई जना पक्राउ गरेका जिल्ला प्रहरी कार्यालय जाजरकोटले जनाएको छ। 

प्रहरीका अनुसार शिवालय गाउँपालिका–६ रिसिनाका नवीन शाहीले सिकार खेल्दै गरेको देखेपछि उनलाई नियन्त्रणमा लिई सिकार खेल्दै गरेको एउटा र घरमा खानतलासी गर्दा अर्को गरी दुई वटा भरुवा बन्दुक फेला परेको छ। 

यस्तै, सोही गाउँका टेकबहादुर शाहीको घरमा खानतलासी गर्दा दुई वटा भरुवा बन्दुक फेला परेको जिल्ला प्रहरी कार्यालय जाजरकोटका प्रमुख (डिएसपी) मधु कुमार थापाले जानकारी दिए।

‘प्रहरी टोली गस्तीमा गइरहेका बेला नवीन शाहीले सिकार खेलिरहेको देखेपछि उनलाई नियन्त्रणमा लिई खानतलासी गर्दा घरमा पनि अर्को भरुवा बन्दुक भेटियो,’डिएसपी थापाले भने, ‘सोही गाउँका टेक बहादुर शाहीको घरमा पनि खानतलासी गर्दा दुई वटा भरुवा बन्दुक भेटिए। दुवै जनालाई पक्राउ गरी जिल्लामा ल्याउन थालिएको छ।’

कात्तिक ४, २०७८ बिहीबार १८:२८:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।