सुदूरपश्चिमका तीन जिल्लामा काँग्रेस वडा अधिवेशन अनिश्चित
धनगढी : क्रियाशील सदस्यता विवाद समाधान नहुँदा सुदूरपश्चिमका तीन जिल्लामा कांग्रेसकोे वडा अधिवेशन अनिश्चित बनेको छ।
मङ्सिरमा १४ औँ महाधिवेशनको मिति तोकेको नेपाली कांग्रेसको वडा अधिवेशन १८ गतेदेखि सुरु भएकोमा हाल सम्म कैलाली, डडेलधुरा र बाजुरामा भने क्रियाशील सदस्यता विवादका कारण अधिवेशन अनिश्चित बनेको हो।
कैलाली र बाजुरामा अझै पनि नामावली नै प्रकाशन गरिएको छैन भने डडेलधुरामा नामावली प्रकाशित भएपछि सोही विषयमा विवाद हुँदा झडपको स्थिति सिर्जना भएको थियो।
क्रियाशील सदस्यता वितरण गर्दा पार्टीमा रहेका गुटले एक अर्कालाई वडादेखि नै हराउने गरी क्रियाशील सदस्यता वितरण गरेकोले कांग्रेसमा किचलो बढेको बताइएको छ।
काँग्रेसका कैलाली जिल्ला उपसभापति प्रकाश बमले सदस्यता विवाद नमिल्दा अधिवेशन अनिश्चित बनेको बताए।
‘२२ गतेभित्र गर्ने तयारी थियो तर सदस्यता विवाद अझै टुङ्गो लागेको छैन,’ उनले भने, ‘केन्द्रमा विवाद समाधानको प्रयास भइरहेको छ।’
‘टीकापुर नगरपालिका वडा नम्बर १, लम्की चुहा नगरपालिका र कैलाली निर्वाचन क्षेत्र नम्बर ४ मा क्रियाशील सदस्यताबारे विवाद रहेको छ’, उपसभापति बमले भने ‘प्रक्रिया पूरा नगरी सिधै केन्द्रबाट पनि सदस्यता थप गर्ने कार्य भएको छ, त्यसैले विवाद बढेको हो।’
वडा अधिवेशन नै अनिश्चित बनेको अवस्थामा जिल्ला सभापतिका लागि भने दौडधुप सुरु भएको छ। काँग्रेसको जिल्ला सभापति पदका लागि वर्तमान उपसभापति बम, नेता नारायणदत्त भट्ट, नृपबहादुर ओड, डा रणबहादुर रावल, गणेश देउवा, खेमराज चौधरीलगायतका नेता आकांक्षी देखिएको चर्चा छ।
पार्टीका जिल्ला सभापति नरनारायण शाह दुई कार्यकाल सभापतिको जिम्मेवारीमा रहिसकेका छन्। तेस्रो कार्यकाल सभापतिमा उठ्न नपाइने काँग्रेसको विधानमा व्यवस्था छ।
भदौ २७ गते गाउँ–नगर अधिवेशन सम्पन्न गर्ने तथा असोज १० र ११ गते जिल्ला अधिवेशन गर्ने काँग्रेसको तालिका छ तर कैलाली र बाजुरामा क्रियाशील सदस्यको नामावली नै सार्वजनिक भएको छैन।
पार्टी सभापति शेरबहादुर देउवाको गृह जिल्ला डडेलधुरामा भने जिल्लाबाट पठाइएका चार सय बढी क्रियाशील सदस्यको नाम हटाएर केन्द्रबाट तीन सय हाराहारीमा अन्यको नाम समावेश गरिँदा विवाद भएको छ। निर्वाचन समितिले वडा अधिवेशन २५ गते तोकेको छ भने जिल्ला सभापतिले विज्ञप्ति जारी गर्दै स्थगित गरेको जानकारी दिएका छन्।
क्रियाशील सदस्यतामा गरिएको हेरफेरले गर्दा वडा अधिवेशन नगरी गलत कार्यको प्रतिकार गरिने डडेलधुरा काँग्रेसका सभापति कर्ण मल्लले बताए।
मङ्गलवार दिउँसो बसेको जिल्ला कार्यसमिति बैठकमा विवाद हुँदा कार्यालयमै कार्यकर्ताबीच कुटाकुट समेत भएको थियो ।
सातौँ जिल्ला अधिवेशनका लागि डडेलधुरामा खटिएका निर्वाचन अधिकृत लोकेन्द्रबहादुर बमले बैठक पुस्तिकामा हस्ताक्षर नगरेपछि सुरु भएको विवाद अन्ततः कुटाकुटमा परिणत भएको एक कार्यकर्ताले बताए।
क्रियाशील सदस्यताको विषयमा छलफल भइरहँदा निर्वाचन अधिकृतले एक पक्षीय साथीहरूलाई दुराशयपूर्ण तरिकाले उक्साउनुका साथै गैर जिम्मेवारी रूपमा अभिव्यक्ति दिएका कारण पार्टी कार्यालयमै झडप भएको काँग्रेस जिल्ला पार्टी सभापति कर्णबहादुर मल्लले बताए।
‘डडेलधुरामा ५ सय हाराहारीमा पुराना क्रियाशील सदस्य हटाएर नामावली प्रकाशित गरिएको छ, ३ सय हाराहारीमा नयाँ क्रियाशील थप्ने काम गरिएको छ,’ उनले भने, ‘जिल्ला कार्यसमितिले अधिवेशन रोक्ने निर्णय गरेको छ, तर निर्वाचन समितिले प्रहरीको घेरामा २५ गते वडा अधिवेशन तोकेको छ।’
बाजुरा जिल्लामा पनि वडा अधिवेशन सुरु भएको छैन। बाजुरा जिल्लामा ४ सय ५१ जना नयाँ क्रियाशील सदस्यको नामावली दुधकोशी गाउँपालिकाको लेटर प्याडमा लेखेर संस्थापन पक्षले बदमासी गरेको आरोप लागेको छ।
बाजुरामा जिल्ला सभापतिको मिलेमतोमा नै फोरम लगायत अन्य पार्टीबाट आएका भनेर चार सय ५१ जनाको फर्जी नामावली तयार गरिएको स्थानीय नेताहरूको आरोप छ।
भदौ २५, २०७८ शुक्रबार ०७:११:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
