हास्य कलाकार जोगिन्दरको गाईजात्रे भिडियो ‘बकम्फुस्साय नमः’ युट्युबमा
३ वर्ष अघि
काठमाडौं : गाईजात्रालाई लक्षित गर्दै हास्य कलाकार शिवशंकर रिजाल ‘जोगिन्दर’ले हास्यव्यंग्य भिडियो ‘बकम्फुस्साए नमः’ सार्वजनिक गरेका छन्।
ओएसआर डिजिटलको युट्युब च्यानलमार्फत उक्त भिडियो बुधबार साँझ सार्वजनिक गरिएको हो। हास्यव्यंग्यमा उनले देशको समसामयिक राजनीति, विकृति तथा विसंगतिप्रति प्रहार गरेका छन्।
कलाकार रिजालका अनुसार हास्यव्यंग्य भिडियोमा एक प्यारोडी गीतसँगै प्रहसनसमेत छ।
प्रहसनमा झण्डै साढे तीन वर्ष सरकारको नेतृत्व गरेर बाहिरिएका एमाले अध्यक्ष केपी शर्मा ओलीलाई व्यंग्य गरिएको छ। प्रहसनमा दमन रूपाखेती, शशी विक्रम थापा, घनश्याम गौतम ‘नक्कली प्रचण्ड’, सुरेश तिमल्सिना ‘नक्कली ओली’, सबु लामिछाने, वेदमणि अधिकारी, प्रेम शर्मा पौडेल, श्रेया दुलाल, शिवराम कार्की, धिरेन्द्र सिंह लगायतको अभिनय छ। गायिका राधिका हमाल राष्ट्रपतिको भूमिकामा देखिएकी छन्।
प्यारोडी गीतमा शंकर कार्कीको शब्द छ भने स्वर शशी विक्रम थापा तथा राधिका हमालले दिएका छन्।
२०६१ सालबाट गाईजात्रे प्रस्तुति दिँदै आएका रिजालकाे याे २० औं कोसेली हो। उनले हास्यव्यंग्यमार्फत समसामयिक विषय र राजनीतिक विकृतिप्रति झटारो हान्दै आएका छन्।
यो वर्षको गाईजात्रा आगामी भदौ ७ गते परेको छ।
साउन १४, २०७८ बिहीबार १५:०१:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
