कर्णाली प्रदेश समाज दक्षिण कोरिया र जापानद्वारा प्रदेश सरकारलाई अक्सिजन कन्सन्ट्रेसन मेसिन हस्तान्तरण
सुर्खेत : कर्णाली प्रदेश समाज दक्षिण कोरिया र जापानले प्रदेश सरकारलाई अक्सिजन कन्सन्ट्रेसन मेसिन हस्तान्तरण गरेको छ।
कर्णाली प्रदेश समाज दक्षिण कोरियाका सल्लाहकार लक्ष्मीप्रसाद बस्नेत र जापानका सल्लाहकार प्रेम रावलले बुधबार सामाजिक विकासमन्त्री यज्ञबहादुर बुढाक्षेत्रीलाई सात थान अक्सिजन कन्सन्ट्रेसन मेसिन हस्तान्तरण गरे।
कार्यक्रममा सामाजिक विकासमन्त्री बुढाक्षेत्रीले कोरोना संकटका बेला रोजगारीका लागि विदेशमा रहेका नेपालीले गरेको सहयोग महत्त्वपूर्ण रहेको बताए।
‘रोजगारीका लागि कोरिया र जापानमा रहेका नेपालीले आफ्नो छाक काटेर कोरोना संकटमा गरेको सहयोग धेरै महत्त्वपूर्ण छ,’ मन्त्री बुढाक्षेत्रीले भने, ‘आफ्नो माटोप्रतिको माया देखाउने सम्पूर्ण विदेशी भूमिमा रहेका नेपालीलाई सरकारको तर्फबाट हार्दिक आभार व्यक्त गर्दछु।’
कर्णाली प्रदेश समाज दक्षिण कोरियाका अध्यक्ष प्रकाश बस्नेतले कोरिया र जापानमा रहेका नेपालीले संकलन गरेको रकमबाट सात थान अक्सिजन कन्सन्ट्रेसन प्रदान गरिएको बताए।
‘कोरोनाका कारण अक्सिजन नपाएर हाम्रा आफन्तले दुःख पाएको टुलुटुलु हेरेर बस्न सकेनौं,’ अध्यक्ष बस्नेतले भने, ‘छाक कटाएर केही रकम जम्मा गर्याैं। त्यसैबाट अक्सिजन कन्सन्ट्रेसन मेसिन खरिद गरेर पठाएका हौं।’
कर्णाली प्रदेश समाज दक्षिण कोरिया र जापानबाट सात थान १० लिटरका अक्सिजन कन्सन्ट्रेसन मेसिन कर्णाली प्रदेश अस्पतालसहित पाँच जिल्लालाई वितरण गरिएको हो।
कर्णाली प्रदेश समाज, जापानका अध्यक्ष कृष्ण शाहीले कर्णाली प्रदेश अस्पतालमा दुई, चौरजहारी मिसन अस्पताल, जाजरकोट जिल्ला अस्पताल, दैलेख जिल्ला अस्पताल, कालिकोटको रास्टकोट अस्पताल र कर्णाली स्वास्थ्य विज्ञान प्रतिष्ठानमा एक–एक थान अक्सिजन कन्सन्ट्रेसन उपलब्ध गराइएको बताए।
असार २, २०७८ बुधबार १६:२३:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
