सल्यानमा आगलागीबाट तीन घरमा क्षति
सुर्खेत : सल्यानको कपुरकोट गाउँपालिका–२, दानवाङमा आगलागीबाट तीन घरमा क्षति पुगेको छ।
आगलागीबाट दुई घरमा पूर्ण क्षति हुँदा एक घरमा सामान्य क्षति भएको कपुरकोटस्थित प्रहरी चौकीले जनाएकाे छ।
प्रहरीका अनुसार आगलागीबाट स्थानीय सुकबहादुर बुढा र खर्कबहादुर घर्तीको घर पूर्ण क्षति भएको छ। उनीहरूको घरको छानो फुसका थिए।
यस्तै, केशर घर्तीको घरको एकतर्फको भाग जलेको प्रहरी चौकी, कपुरकोटले जनाएको छ। घर्तीको घरको छानो जस्तापाताको थियो।
आगलागीबाट घरमा रहेको अन्न, कपडा र सुकबहादुरको नगद १५ हजार, खर्कबहादुरको दुई लाख ५० हजार रूपैयाँ र एक तोला सुन जलेको प्रहरीको भनाइ छ।
स्थानीय र नेपाल प्रहरीको सक्रियतामा आगो नियन्त्रणमा आएको प्रहरी चौकी, कपुरकोटका प्रमुख यमबहादुर बस्नेतले जानकारी दिए। घरमा कोही नभएको समयमा आगलागी भएको उनको भनाइ छ।
चैत ६, २०७७ शुक्रबार २१:२६:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
