एमाले कार्यकर्ता भेलाको अध्यक्षता झलनाथ खनालले गर्ने
काठमाडौँ : नेकपा एमाले झलनाथ खनाल र माधव कुमार नेपाल समूहको भेलामा नेता कार्यकर्ता पुग्ने क्रम चलिरहेको छ।
ललितपुर सानेपाको हेरिटेज गार्डेनमा राष्ट्रिय कार्यकर्ता भेलामा सहभागी हुन नेता नेपाल, घनश्याम भुसाल, भीम रावल लगायतका नेता पुगिसकेका छन्।
अध्यक्ष एवं प्रधानमन्त्री केपी शर्मा ओलीले भेलामा सहभागी हुनेलाई कारबाही गर्ने धम्की दिएपनि भेलामा २५ सय नेता कार्यकर्ता सहभागी हुने एमालेका तर्फबाट प्रतिनिधिसभा सदस्य जीवनराम श्रेष्ठले जानकारी दिए।
सर्वोच्च अदालतको परमादेशपछि ब्युँतिएको एमालेमा अध्यक्ष ओलीले एकलौटी निर्णय गरेको भन्दै खनाल नेपाल समूहले आज राष्ट्रिय कार्यकर्ता भेला गरेको हो। भेलामा पार्टीलाई एकताबद्ध बनाएर लैजाने विषयमा छलफल हुने श्रेष्ठले जानकारी दिए।
भेलामा पार्टी अध्यक्षको रूपमा आउन ओलीलाई निम्तो दिएको श्रेष्ठले बताए। भेलाको अध्यक्षता वरिष्ठ नेता झलनाथ खनालले गर्ने र स्वागत मन्तव्य माधव कुमार नेपालले राख्ने श्रेष्ठले जानकारी दिए।
चैत ४, २०७७ बुधबार ११:२२:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
