एमाले र माओवादी केन्द्र ब्युँतिएपछि प्रदेश १ सरकार सुरक्षित 

इटहरी : सर्वोच्च अदालतले नेकपा एमाले र माओवादी केन्द्र ब्युँताएपछि प्रदेश १ सरकार सुरक्षित भएको छ। 

सर्वाेच्चको परमादेशसँगै एमाले र माओवादी केन्द्रका प्रदेश सांसद्हरूले आ–आफ्नै पार्टीमा फर्किने भएपछि एमालेका शेरधन राई नेतृत्वको सरकार बहुमतमा पुगेको हो। 

यसअघि साबिकको नेपाल कम्युनिस्ट पार्टी (ने क पा)को पुष्पकमल दाहाल–माधवकुमार नेपाल पक्षधर सांसद्हरूले प्रदेशसभा सचिवालयमा अविश्वासको प्रस्ताव दर्ता गराएपछि राई नेतृत्वको सरकार अल्पमतमा थियो। 

गत पुस १२ गते दाहाल–नेपाल पक्षधर ३७ जना सांसद्ले मुख्यमन्त्री राईविरुद्ध अविश्वासको प्रस्ताव दर्ता गराएका थिए। उक्त प्रस्ताव यही फागुन ९ गते संसद्मा टेबलसमेत भएको थियो। 

तर, सर्वाेच्चको परमादेशसँगै एमाले र माओवादी केन्द्रका प्रदेश सांसद्हरू आ–आफ्नै पार्टीमा फर्किने भएपछि मुख्यमन्त्री राईविरुद्धको अविश्वास प्रस्तावसमेत फिर्ता हुने अवस्थामा पुगेको छ। 

हाल प्रदेशसभामा नेकपा एमालेको एक्लै बहुमतमा छ। कूल ९३ सिट रहेको प्रदेशसभामा एमालेका ५१ सांसद् छन्। तीमध्ये राईको पक्षमा ३६ जना छन्। बाँकी १५ जना पनि तत्काल राईविरुद्ध उत्रिने सम्भावना कम भएकाले प्रदेश १ सरकार सुरक्षित देखिएको हो।

प्रदेशसभामा कांग्रेसका २१, माओवादी केन्द्रका १६, जनता समाजवादी पार्टीका ३, राप्रपा र संघीय लोकतान्त्रिक मञ्चको १–१ सांसद् छन्।प्रदेशसभाको बैठक चैत २ गते बस्ने निर्णय भएको छ। 

एमालेको बोर्ड राखिँदै

सोमबार पर्यटनमन्त्री भानुभक्त ढकालको अगुवाइमा नेकपा एमाले मोरङ जिल्ला कार्यसमितिको कार्यालयमा बोर्ड राखिएको छ।विराटनगरस्थित पञ्चालीमा रहेको नेकपा पार्टी कार्यालयको बोर्ड हटाएर एमालेको बोर्ड राखिएको हो।

एमालेबाट नै सम्पूर्ण कम्युनिस्ट कार्यकर्ताको रक्षा हुने भन्दै ढकालले एमालेको विकल्प नरहेको बताए। 

त्यससँगै इटहरी उपमहानगरपालिकामा रहेको नेकपा पार्टी कार्यालयको बोर्ड हटाएर पुनः एमालेको बोर्ड राखिएको छ। सुनसरी जिल्ला पार्टी कार्यालयको पनि बोर्ड परिवर्तन गरिएको छ। 

फागुन २५, २०७७ मंगलबार १६:४१:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।