‘डार्लिङ्स’मा सहकार्य गर्दै आलिया र शाहरुख

मुम्बई : बलिउड अभिनेत्री आलिया भट्टले चलचित्र ‘डार्लिङ्स’मा अभिनेता शाहरुख खानसँग सहकार्य गर्ने बताएकी छन्। 

उनले सामाजिक सञ्जाल इन्स्टाग्राममा पोस्ट गर्दै आफ्नो प्रोडक्सन हाउस इन्टरनल सनसाइन र अभिनेता शाहरुखको प्रोडक्सन हाउस रेड चिल्लिज इन्टरटेनमेन्टबाट चलचित्र बनाउने घोषणा गरेकी हुन्। 

उनले लेखेकी छन्, ‘यो निकै खास छ। इन्टरनल सनसाइन प्रोडक्सनको मेरो पहिलो उपहार ‘डार्लिङ्स’को निर्माण घोषणा गर्दैछु। आफ्नो फेवरेट शाहरुख खानको रेड चिल्लिज इन्टरटेनमेन्टको साथमा।’

चलचित्रलाई जसमित के रिनले निर्देशन गर्ने उनले बताएकी छन्। चलचित्रकी अभिनेत्री आलिया आफै छिन्। चलचित्रमा उनीसँगै शेफाली शाह, विजय बर्मा, रोशन मैथ्यूको मुख्य भुमिका रहने छ। 

भारतीय समाचार एजेन्सीका अनुसार शेफाली र आलिया आमा–छोरीको भूमिकामा हुने छन्। चलचित्रमा शाहरुख पनि निर्माताको रूपमा रहने छन्। 

यसअघि आलिया र शाहरुख खानले ‘डियर जिन्दगी’मा सँगै अभिनय गरेका थिए। तर, यस चलचित्रमा शाहरुखले अभिनय गर्ने/नगर्नेबारे बताइएको छैन। 

एजेन्सी
 

फागुन १७, २०७७ सोमबार १९:२५:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।