मनीषाको आत्मसंस्मरण नेपाली अनुवाद ‘जिजीविषा’ सार्वजनिक 

काठमाडौं : अभिनेत्री मनीषा कोइरालाको आत्मसंस्मरण पुस्तक ‘हिल्ड’को नेपाली अनुवाद ‘जिजीविषा’ सार्वजनिक भएको छ। 

अंग्रेजी संस्करणलाई निकै रुचाइएपछि पुस्तकलाई नेपालीमा अनुवाद गरि प्रकाशन गरिएको हो। फाइन प्रिन्टले प्रकाशन गरेको पुस्तकलाई नेपालीमा पत्रकार स्वरूप आचार्यले अनुवाद गरेका हुन्। अंग्रेजी पुस्तक ‘हिल्ड’ लाई नीलम कुमार र अभिनेत्री मनीषाले लेखेका थिए। 

पुस्तकमा क्यान्सरबाट निको हुन मनीषाले गरेको संघर्ष र राजनीतिक कुरालाई समावेश गरिएको छ। 

पूर्वमिस नेपाल शृंखला खतिवडासँगको कुराकानीमा मनीषाले क्यान्सर लाग्नुअघि आफूले जीवनको त्यति महत्त्व नबुझेको र पछि मात्रै यसका् महत्त्व थाहा पाएको बताइन्।  

उनले रोग लागे पैसा खर्च गरेर मात्र छुटकारा नपाइने बताएकी छन्। उनले भनिन्, ‘वास्तवमा मनुष्य जीवन कति महत्त्वपूर्ण छ। तर, त्यही जीवनलाई हामीले गलत तरिकाले उपयोग गरिरहेका रहेछौं।’ 

त्यसमा सचेत हुन पुस्तकले धेरथोर सिकाउने मनीषाको दाबी छ।  

उनले भनिन्, ‘अमेरिकामा क्यान्सर उपचारका क्रममा एक बौद्ध रिन्पोचेले क्यान्सरबाट परेको दुःख भोगाइबारे टिपोट गर्न भन्नुभएको थियो। त्यस बेलादेखि मैले क्यान्सरपछि भोगेका दुःख र कष्टलाई टिपोट गर्दै आएको थिएँ। र, त्यसलाई पछि पुस्तकमा ल्याएकी हुँ।’ 

मनीषाले पछिल्लो पटक बलिउड फिल्म ‘सञ्जू’मा अभिनय गरेकी थिइन्। 

पुष ७, २०७७ मंगलबार ०९:४४:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।